Un percorrido feminino pola decimonovena Semana de Cinema Euroárabe AMAL 2021

20 de Outubro de 2021

A Fundación Araguaney-Puente de Culturas promove a decimonovena Semana de Cinema Euroárabe AMAL 2021, que se celebrará entre os días 25 e 29 de outubro no Teatro Principal de Santiago de Compostela, sempre ás 21h. Dende a organización do festival seleccionan para nós dous dos cinco filmes que se proxectarán durante o festival, dúas premieres no Estado que ofrecen dúas olladas de muller sobre a cultura euroárabe: Gods of Molenbeek e Lift like a girl. As entradas terán un custo de tres euros (+ gastos de xestión) e estarán á venda en Ataquilla.com. Tamén as entradas restantes poderanse adquirir no despacho de billetes do Teatro Principal, unha hora antes de cada proxección.

► Luns 25 ás 21h. Gods of Molenbeek (Aatos ja Amine). Reetta Huhtanen / 2019 / Finlandia, Bélxica e Alemania / 73 minutos

O distrito de Molenbeek, en Bruxelas, ten fama de ser un dos epicentros do xihadismo europeo, pero para Aatos e o seu amigo Amine, é simplemente o seu fogar. Xuntos buscan respostas ás grandes preguntas da vida, pero a brutalidade do mundo adulto irrompe cando os terroristas detonan unha bomba no barrio. Reetta Huhtanen é graduada na ELO Filme School de Finlandia, estudou realización de documentais, ademais de licenciarse en Sociología e Filosofía. As súas películas, The Coffee Break, sobre tres eternos estudantes, e Economic Forecasts, sobre o opaco universo da economía, proxectáronse en numerosos festivais internacionais. Gods of Molenbeek é a súa primeira longametraxe documental.

► Mércores 27 ás 21h. Lift like a girl. Mayye Zayed / Exipto, Dinamarca e Alemania / 2020 / 92 minutos

Guiada polo seu implacable adestrador, unha levantadora de peso adolescente emerxe desde un modesto ximnasio de Alexandría, Exipto, para intentar chegar aos Xogos Olímpicos. Mayye é directora, produtora e fotógrafa. En 2013 fundou Rufy's, unha produtora de cinema independente con sede en Alexandría, en Exipto. Lift  like a girl é o seu primeiro documental e con el, aínda ofrecendo unha certa perspectiva de xénero, reflicte tamén un mundo complicado, o do deporte de elite, e non se libra de tópicos sobre halterofília, forza e masculinidade

Na presentación do festival, Ghaleb Jaber Martínez destacou que os dezanove anos de historia do festival están sintetizados unicamente en tres palabras, "orgullo, legado e cultura”. Segundo explicou, o orgullo fai referencia á historia do festival irremediablemente unido ás rúas de Compostela, como testemuña de idas e vindas, alegrías, tristezas, amores e desamores. “Durante tantos e tantos días, as pedras molladas dá cidade documentaron fotograma a fotograma ou que somos hoxe e sentímonos profundamente orgullosos e orgullosas diso”, indicou.

Mercedes Rosón, pola súa banda, recordou que a decimonovena edición do festival Amal “volve a converter a Compostela nesa ponte entre dúas culturas tan necesitadas de encontros coma este para coñecerse, comprenderse e respectarse”. Proseguiu facendo un símil co Camiño de Santiago como “porta de Europa a España durante máis de mil anos”, polo que chegou o legado cultural, científico e ideolóxico do vello continente. “Compostela é, foi e seguirá sendo unha cidade aberta, sensible e moi respectuosa que traballa polo entendemento entre as culturas e unha cidade que aprende da diversidade”, apuntou.

Cociña árabe

Como é habitual, o restaurante Caney organizará a Semana Gastronómica de AMAL, do 25 ao 30 de outubro, onde se ofrecerá aos comensais un menú árabe deseñado por Pedro Roca, chef do restaurante coñecido polo seu gusto pola gastronomía intercultural e que achegará á proposta o seu toque persoal, pero conservando as características e propiedades da auténtica cociña árabe.

Nas fotografías da presentación aparecen o presidente da Fundación Araguaney-Puente de Culturas e director da Semana de Cinema Euroárabe AMAL, Ghaleb Jaber Martínez; o secretario Xeral de Cultura da Xunta de Galicia, Anxo M. Lorenzo; e a concelleira de Urbanismo, Vivenda, Cidade Histórica, Acción Cultural e Igualdade do Concello de Santiago, Mercedes Rosón.