Andainas para as mulleres do rural

26 de Abril de 2019
por: TM

Tras a celebración dos obradoiros de empoderamento das mulleres do rural, as parroquias de Compostela volven ser o epicentro da igualdade con diversas andainas organizadas polas concellarías de Igualdade e de Medio Rural onde poderán participar mulleres de calquera idade que vivan nas parroquias de Santiago. 

Esta actividade busca crear redes de apoio entre as participantes, promover hábitos de vida saudábeis e fomentar o coñecemento da contorna. As participantes do gran encontro de mulleres do rural que tivo lugar hai un mes en Busto sinalaron o descoñecemento que as mulleres das parroquias teñen doutras parroquias do Concello. En termos xerais, o rural segue a ser moi descoñecido non só para a xente que vive nos barrios da cidade, senón tamén para a veciñanza doutras parroquias.

Os roteiros serán circulares, de 5 quilómetros aproximadamente e de dificultade baixa, acordes a calquera tipo de forma física. Comezarán na parroquia da Sabugueira este luns 29 de abril ás 18:00 horas, continuando en Enfesta, Marantes e Nemenzo o 14 de maio ás 18:00 horas, e rematando en Figueiras o martes 21 de maio ás 17:30 horas.

Para máis información e inscricións podedes dirixirvos a mposeo@gmail.com ou chamar ao teléfono 646 988 198.